七年之痒 同性之恋 整容削骨，这部剧竟然我一天追完全集

端午假期已经放咗三分之二，唔知有几多自己友同我一样，见到个热头就唔想出街，日日宅喺屋企。

呢两日都睇紧一部TVB旧作，一季先十集，但系每集都别具匠心，就系——

loving you 我爱你

《loving you 我爱你》（以下简称《我爱你》）系TVB千禧年推出嘅单元电视剧，一共十集，每集讲述咗唔同香港人嘅生活故事，上至赫赫有名嘅富翁明星，下至红灯区边缘人士，都囊括其中。

千禧年嘅时候，我谂好多人同我一样，都系追紧《男亲女爱》，所以好多人都忽略咗呢部得十集嘅都市单元剧！

但呢部十集嘅电视剧，完全唔输畀《男亲女爱》。

首先，由于每集故事情节相互独立，主角系身份、地位、背景、性格完全唔同嘅人，如何使每集嘅角色彼此之间有区分度，令观众容易代入故事，就好考验演员嘅演技。

《我爱你》第一季嘅主要演员包括邓萃雯、吴启华、薛家燕、张同祖、黄智贤等，个个都系演技派。

无论系红灯区按摩女、事业女强人、恨嫁中女、缩骨师奶仔，邓萃雯都演乜似乜，毫无违和感。

喺戏入边，吴启华嘅多面性充分发挥，既可以演懦弱跑老婆嘅哨牙佬，又可以演风度翩翩嘅钻石黄老五，每个角色散发出完全唔同嘅气质。

薛家燕就更加唔使讲啦，每个角色嘅装扮、神情、小动作都完全唔一样，每集都觉得佢系本色出演。

其次，当你以为《我爱你》就系一部爱情剧，咁你就大错特错。

《我爱你》系一个关于众生嘅剧集，讲述嘅系现代人之间嘅情感故事，包括男女之情、父母之爱、忘年感情、同性之爱、禁忌之爱等。

其中既有幽默搞笑嘅家庭喜剧，又有温馨治愈嘅爱情故事，每集得四十几分钟，故事虽然简短，情节虽然平淡，但胜在情节紧凑，主题不失内涵，引人深思。

其中有个故事就系关于同性恋。

故事发生于一个家境优渥嘅知识分子家庭，一家之主嘅父亲系一位德高望重嘅退休校长，膝下有两子一女。

父亲发现大仔嘅性取向之后，由于传统思想同世俗目光，两父子争执以至关系决裂，最终大仔出走三年，不见父母。

三年后，时间慢慢令父亲软化，加上周围人嘅劝说，父亲一步步接受大仔嘅性取向，并向大仔嘅同性伴侣示好。

当呢个分崩离析嘅家庭慢慢走向团结嘅时候，另一个仔，排行第三嘅细佬发现同大佬有一样嘅性取向。

但父母得知两个仔都系同性恋之后，本来修补中嘅家庭关系即刻崩裂，一场家庭矛盾不可避免爆发……究竟最后一家人能否和好如初？

其中有个情节非常令人深思，一向开明随和嘅继母得知大仔嘅性取向之后，可能坦然接受，并一直劝父亲放下成见，重新接纳大仔。

但到咗发现自己生嘅细仔系同性恋，反而一改以往作风，即刻质问大仔，“点解教坏自己个仔？”

当事情发生喺其他细路，好多父母仲可以从容面对，但当得知自己亲生骨肉都系咁，平时再开明再乐观嘅父母，一时间都会难以接受，呢个时候就需要双方沟通同理解。

当然，《我爱你》之中，唔系所有故事都系咁，其中不乏诙谐幽默嘅市井故事。

比如有个故事就好似《富贵逼人》，喺一个住屋邨嘅穷人家庭，由于屋企两个女性都霸道泼辣，令到岳父同女婿都极其怕老婆，日日被老婆压迫。

两翁婿存少少私己，屋企就即刻开片，两个女人一齐炮制佢哋。

两个一事无成嘅老婆奴，有一日竟然畀佢哋中咗六合彩头奖，三千几万！！！

▲连中头奖都剩系敢搵个角落庆祝

因为日日被老婆“压榨”，所以两翁婿约定瞒住自己老婆，独吞奖金，一齐叹世界。

但后来，两人都发现自己老婆虽然恶，但心入边对自己好好，两人内心都受到谴责，究竟两个小男人忍唔忍得住唔同老婆讲，可唔可以保得住巨额奖金？

欲知结局如何，大家就自己去睇啦！

其实仲有好多精彩嘅故事，比如追债佬爱上欠债按摩女，两个人究竟会唔会有好结果？

比如夫妻面临七年之痒，丈夫精神出轨青春少艾，呢个家庭又如何维持？

仲有一啲好平淡嘅故事，比如大明星与女助手嘅友谊，当与身边挚友轨道渐行渐远，又应该如何维护友情？

十个讲述人生悲欢离合嘅故事，未必每个故事都曲折离奇，未必每个结局都如你所愿，但呢十个故事可以喺消磨你时间之余，令你有所收获。

我估你依家想问：

醒水啲，自己过嚟问我！

各位自己友，你哋又有几多个睇过？

特此声明