从古惑女爬到黑社会大姐大，她就差一个外号

之前我写过「假如出嚟行古惑，你会叫乜名？」，主要讲咗做个黑社会大佬，点样帮我自己起个响亮嘅「朵」。

下边有人留言话整返一期黑社会大家姐可以用嘅——

所以今日就整返篇续集，讲下黑社会大家姐嘅「朵」，同埋回顾下荧幕上经典嘅大家姐或古惑女形象。

一提到黑道、黑帮、古惑仔，大家第一时间谂到嘅依然会系陈浩南、山鸡之类嘅热血男儿，仿佛江湖争斗永远只属于男性。

黑帮电影之中，大部分女性只能够充当花樽、间谍、旁观者等角色，但仍然有唔少经典嘅女性角色，为残酷血腥嘅黑帮电影注入女性嘅光芒。

喺一众男性古惑仔之中求生存，都已经唔系易事，要一步步往上爬更加系难上加难，最后企喺顶端嘅少之又少，今次就从两位最犀利嘅女人讲起——

以数字起名

部分女性角色起一个带数字嘅花名，由于旁人不知道因由，而显得额外有气势，比如九姑娘、十三妹。

九姑娘嘅外号，源于佢本名叫“郑九妹”，由于民国时期，大家称呼女性多数用姑娘，所以就有咗“九姑娘”嘅称号。

出自《巾帼枭雄之义海豪情》，邓萃雯饰演

作为洪兴社十二分堂堂主之中唯一嘅女性，十三妹一角无疑喺男性荷尔蒙爆棚嘅《古惑仔》中，增添咗一抹女性色彩。

出自《古惑仔》系列，吴君如饰演

电影《洪兴十三妹》之中，除咗介绍十三妹嘅过去及转变，亦提及“十三妹”一名嘅由来。

电影介绍，十三妹出生当晚，佢老窦吹水达喺赌档连赢十三铺小，所以帮主角起名为崔小小，外号十三妹。

但我搜集资料嘅时候，发现另一种说法，十三妹父亲与十二位江湖话事人关系友好，于是自己嘅女皆与之上契，成为契妹，即“十三妹”。

上边两个角色非常相似，都有住某种过去，经历磨难之后喺黑帮爬上高层，身上兼顾男性嘅决绝果断，同女性嘅柔情脆弱，系非常令人难忘嘅女性角色。

XX姐，XX婆

呢种就好平常啦，基本上从自己嘅名攞一个字，后边加个“姐”、“婆”嘅称呼即可。

虽然名好普通，但系令人惊艳嘅角色有唔少，首先系叶璇饰演嘅行姐。

冬菇头加上西装革履，呢啲中性装束令人联想起十三妹，但由于叶璇同吴君如气质不同，叶璇嘅行姐更加多一份女性嘅艳丽，少一份男性嘅硬朗。

出自《至尊无赖》，叶璇饰演

虽然行姐只有十分钟唔到嘅戏份，但佢沟起女上嚟简单粗暴，睇啱就直接上去调戏，吓到有妇之夫嘅吴佩慈错愕无语。

跟住又点少得《陀枪师姐》嘅心姐，风情万种嘅康华喺《陀枪师姐》演技大爆发，其黑帮气场完全唔比任何一个男性差，面对警察从容淡定，攞起机枪就毫无犹豫开火，十足十一个真正嘅黑社会大姐大。

出自《陀枪师姐》，康华饰演

由于角色大获好评，后几部康华都要“复活”饰演唔同角色，但我始终觉得第一部嘅心姐最为经典。

相似嘅仲有我哋最中意嘅钉姐，同埋鲁芬饰演过嘅经典角色山东婆。

出自《使徒行者》，佘诗曼饰演

出自《女子监狱》，鲁芬饰演

同“鸡”有关

男性古惑仔之中，外号之中带“鸡”字嘅唔算多，最出名嘅就系山鸡哥。

而女性黑社会之中，同“鸡”有关嘅外号反而比较多，或者同广东人中意用鸡形容泼辣巴扎嘅女性有关。

《食神》之中嘅双刀火鸡，外表奇丑邋遢但内心善良专一，绝对系周星驰电影之中经典女性角色之一，好难想象莫文蔚系点应承牺牲形象嚟扮演呢个角色。

出自《食神》，莫文蔚饰演

每次睇莫文蔚剁牛肉嗰段，我都觉得啲牛肉会好痛~

另一个角色系《古惑女》之中嘅飞鸡，由陈妙瑛饰演，可能大家同我一样惊讶，原来陈妙瑛系演过古惑女。

出自《古惑女》，陈妙瑛饰演

不过角色性格冇咩亮点，只系为咗推动情节发展而设，加上李丽珍同麦家琪嘅美颜衬托下，陈妙瑛呢个角色实在平平无奇，可有可无。

男性化外号

黑帮电影之中，有啲古惑女嘅角色名偏向男性化，令人雌雄莫辨，配上佢哋嘅中性打扮，唔会冲突，反而仲突显出一种男性英气。

比如《古惑女》第一部之中嘅Van仔，由莫文蔚饰演，Van仔嘅原意系小型货车，同角色本身洒脱性格又中意飙车相吻合。

出自《古惑女》，莫文蔚

换个发型，换个装扮，角色就上身，成个人就好似换个灵魂，莫文蔚嘅演技同可塑性真系令人佩服。

《古惑女2》中，主角外号叫火咀，同样系好男性化嘅名，但系何超仪嘅气质演古惑女，总系令人觉得怪怪哋。

出自《古惑女2》，何超仪饰演

唔单单系主角，《古惑女2》整体都比唔上第一部，起码第一部尺度放得更开。

女性化外号

既然有男性化嘅外号，自然就会有偏向女性向嘅可爱外号，突显角色嘅女性特征。

最经典嘅细细粒，《古惑仔》电影之中多次讲到一句话“细细粒，好好食”，除咗系顺口溜，仲系讲紧角色嘅秀色可餐。

仲有同细细粒情同姐妹嘅KK，作为观众嘅我哋，虽然唔知KK呢个名嘅由来，不过就我哋肯定都记得谭小环嘅美貌。

最令人可惜嘅系，两个咁可爱嘅女性角色，最后结局都好凄惨，一个惨死，一个被凌辱，真系令人唏嘘。

《古惑女》之中嘅波子，都系比较可爱嘅女性外号，我每次睇《古惑女》都系重温李丽珍嘅颜值巅峰！

出自《古惑女》，李丽珍饰演

至于点解叫波子，电影之中冇交代，不过我觉得有可能系导演王晶想突显李丽珍嘅某样嘢……